江旻憓在2024巴黎奥运个人女子重剑为港摘下本届首面金牌，返港后不忘感谢前辈为运动付出，让新一辈有更多资源去追梦，更认为香港做运动员好幸福！不过，28年前为香港夺得奥运第一金的“风之后”李丽珊，坦言当年做运动员不容易，辛酸史一大堆，为追梦耗尽积蓄之余，第一年去欧洲集训，更惨到要睡沙滩，甚至要求餐厅收平啲。

李丽珊再为开电视主持《巴黎奥运2024》，因为唔会乱插嘴而获赞，又曾在直播提及无论夺金的江旻憓，还是无缘进入决赛的“体操王子”石伟雄(石仔)都值得敬重及支持，网民大赞有同理心，是冠军运动员典范，珊珊表示只是感同身受，又称从江旻憓访问中有新体验，“佢咬实牙关打逆境剑，原来目标唔係为自己，係要满足其他人，唔想令教练失望，想大家睇得开心啲，回想当年自己嘅金句：‘香港运动员唔係垃圾。’深信运动员真係屈咗好耐。”

▲珊珊成日笑，坦言成功追梦令她好开心。

冒浸死出战釜山亚运

珊珊当年亦试过负伤作战：“2002年10月出战釜山亚运，出赛前腹部经已剧痛，当时队医、教练及队友(现时老公)黄德森都话‘你係咪应该咁搏呢？要唔要考虑退出？’尤其担心滑浪风帆唔喺陆上作赛，风帆得一个人，任何人都唔可以接近，如果痛到晕倒跌落海就会浸死，冇人可以喺短时间内救到我，咁值唔值得呢？”珊珊抱住“亚运中夺金係我个梦，训练咗咁多年冇可能放弃！”忍痛坚持直至完成赛事，“最后真係顶唔顺，要用快艇送埋岸，然后上十字车，连奖牌都冇拎已返港。”珊珊好明白运动员心情，都想喺奥运舞台发挥应有水平，完成梦想。“石仔过去几年受伤患困扰，为赶上拎奥运‘入场券’两度返港打止痛针，都係想兑现东奥时许下嘅承诺，冲第3个奥运。”

当年做运动员少资源

提到现在做香港运动员较多资源，摘金奖金亦较当年100万多，她说：“唔好衡量钱，由零到100万经已好开心，对运动员係鼓励。不过，当年资源有限，营养师、物理治疗师唔太多，咁我又明白嘅，‘饼仔’得咁大，有好成绩先分得到；依家（现在）资源多咗，係人都想香港体坛发展得越嚟越好，多资源係好事，所以成绩成正比，运动员对训练器材要求好高，而且冇资点样出去参赛汲取经验呀？”珊珊当年走遍欧洲做高水平训练，乘机参加巡回赛：“最难忘1990年第一次去欧洲集训，由于budget唔多，到达最后一站比利时，连埋教练4人团队要悭到捱冷瞓（睡）沙滩，甚至露天煮饭食，点知睡醒发现露营餐具被偷，唯有大胆请求中国餐馆老板‘收平啲’，承诺会介绍更多运动员帮衬，老板唔止答应，连日煲汤畀我哋饮，到离开时，仲依依不舍揽住我哋喊（哭）。”

寄语港人为香港努力

另一件发生在挪威的往事亦非常深刻：“当地人早食饭，我哋晚上6点几到达中国餐馆时，食材已所剩无几，老板见我哋想食豆腐，马上驾车回家攞，佢哋真係好好。虽然辛酸但值得，呢啲经历加埋人情味，老咗回味都几好。”珊珊补充，当年提出以超级折头食饭係逼不得已：“冇法子，银包得咁多钱，唔讲价嘅话，畀咗呢餐可能下餐食唔到(唔私下贴钱？)有呀，第一次去欧洲个个揽住银行积蓄去，但屋企超级穷积蓄唔多，仲要多得舅父资助我，10兄弟姊妹帮我照顾屋企畀我去追梦。”另外，她指香港人见到运动员的拼搏精神，亦係目前香港最需要嘅嘢，寄语大家，“香港人继续努力为香建设美好将来；运动员就继续追梦。”

以上内容归星岛新闻集团所有，未经许可不得擅自转载引用。